tagabungtod

(Nakadawat ko ug sulat pinaagi sa email gikan sa usa ka Tagabungtod nga karon lumulupyo na sa Vancouver, Canada. Giganahan ko kay kinasingkasing gyud ang pagkasulat ug gihan-ay gyud sa pulong nga binisaya ug may ginagmay'ng pinisik nga tagalog ug pulong nga inglis. Ang iyang gisulat adunay dakong kahilambigitan sa pinakabag-ong tala nga akong gisulat kagahapong adlawa. tgt)

December 31, 2008

Dear Tagabungtod,

Ako tagabungtod gayud ug dinha gipanganak, mi graduate ug elementary sa Nabunturan Central Elem (1966) ug high school sa Nabunturan National Comp High (1970). Apan lagi kay kitang mga Pinoy mangita man gayod ug maayong pangabuhian (greener pastures) so naa na ko karon dinhi sa Canada (lower mainland Vancouver).

Makaguol gayod nga hunahunaon ang akong nabasa ug nakita sa mga kahoy nga gipamutol. Unsa man ang gihunahuna sa atong gobyerno nga wala man lang timbang timbanga kung unsa ang kapuslanan sa mga kahoy sa atong palibot?

Dinhi sa Canada maski pagputol sa kahoy sa imong kaugalingon nga yuta ug lote dili gayud itugot sa gobyerno. Multahan ka ug presohon pa maski naa na ang punong kahoy sa imong luna. Kung duna may mga development ginakuralan gayud ang puno sa kahoy para dili man lang masamad ang puno ug maputol ang mga sanga.

Pwede man unta to nga i-trim lang o buhinan ug gamay ang mga sanga, nganong giputol man gayud? Wa ba sila kahibalo nga dugay pa kaayong mga panahon ang paabuton para lang modaku ang isa ka punuan sa kahoy?

Daghan pa ang dapat tun-an sa atong mga kababayan kung "greener earth" ug sustainability and atong estoryahan. Kanus-a pa kita makakat-on niini. Tingali panahon na para pag-isipan kini sa atong gobyerno. Daghang salamat sa tagabungtod! & mabuhay!---

LUZ Pedroso Akiatan